名字听起来蛮吓人倒怪葛老苏州吃局

         友情提示:该篇文章请用苏州闲话读。

    老底子苏州有几个名字听起来有点吓人倒怪葛吃局，现在要么呒不哉，要么改头换面哉，今朝我来搭吾笃讲一讲:

     第一样叫“老虎脚爪”。覅弹眼落晴，不是真葛老虎葛脚爪，俚其实是搭大饼差仿不多葛面食。做法是面粉里加点发酵粉、糖、水，弄成功面团，醒透嗞捏成一两左右葛小面团，勒浪上头开个十字花之后就像烘大饼葛浪放勒炉子里烘，烘好嗞拿火夹从炉膛里搛出来，葛些辰光俚就活脱似样老虎葛脚爪，辣赤焦黄，香味四溢，咬一口是外脆里酥，口齿生香。可惜现在该种“老虎脚爪”基本绝迹穷少香得见哉。

      第二样叫“荷叶包死人”。乖乖，苏州人葛浪结棍？死人也好吃葛？不是葛，听起吓人，其实刮嗞搭现在葛粢饭包油条，蛋饼包油条差仿不多，就是换个名字罢。最早应该是拿粢饭铺勒荷叶浪，然后再铺一层绵白糖拌黑芝麻粉，再摆根油条，然后卷起拿捏紧。葛根油条就是所谓葛“死人”，“荷叶包死人”就是葛浪来葛。到上个世纪八、九十年代不用荷叶哉，拿葛种薄葛面衣饼包油条，就像现在马路上外地人现做杂粮差仿不多，现做现卖。记得有爿以豆腐浆出名葛点心店，嫌鄙“荷叶包死人”名字不好听，改成功“荷叶包美人”，不晓得该爿店现在啊有该个了？

    第三样不大吓人，是葛雅称，叫“独脚蟹”。说穿磁就是“发芽豆”——干葛老蚕豆摆勒水里浸泡，发出一个芽过后放调料烧熟或者焐熟。老底子小酒店里侪有葛，搭绍兴咸亨酒店孔乙己吃葛茴香豆有得一比！但不过现小菜场豆制品摊头浪基本浪看不见哉。