“十里南京路，一条步行街。” 作为上海人，对南京路真是忒熟悉唻，简直可以讲是“熟门熟路”。搿条勒勒黄浦区境内个步行街，西起西藏中路，东至河南中路，全长1033米，1999年建成。
1999，对我来讲真是个吉祥个好数字呀，因为就勒搿个一年，我重新回到上海工作，实现了父母年轻辰光个上海梦！
1963年，父母勒上海闵行一次亲朋好友个家庭聚会中相遇，父亲对漂亮文静个母亲一见钟情，母亲呢也是心里有意口难开。伊歇辰光父亲是位年轻英武个现役军人，根红苗正，前途无量。母亲则是知书达理个大家闺秀，眉清目秀。听说因为外公是个大资本家，家庭成份勿好，22岁个姑娘了，却呒没人敢相爱。
但是，年轻勇敢个父亲选择了爱情，伊对母亲一往情深，还特别欢喜母亲个两条又黑又粗个大辫子 ，伊勿顾亲朋好友个反对，迓迓叫带仔母亲到了南京路个老牌亨达利钟表店。父亲用勒部队几年省下来个120块津贴买了一只上海牌全钢机械手表，送拨母亲作为定情物；母亲则剪下心爱个长辫子，用柔软个长丝巾包好，放进父亲个军用书包里，表示“青丝随君行，横也思来竖也思”。两家头勒南京路，望东走到外滩，又望西走到静安寺，海誓山盟，依依惜别。
回部队后一年横里，几经周折，父亲终于带仔母亲到当地个民政部门领了结婚证，但父亲因为讨了资本家个囡儿，提职无望，提前从部队转业，到了核工业部个地质勘探队，专门上山寻铀矿。
当初个上海大小姐戴仔父亲送拨伊个上海牌手表，一心一意跟牢伊，爬山钻洞，吃辛吃苦，生了我伲兄妹三个，拿我伲培养成人。
1999年，我因为工作调动，从江苏个《扬子晚报》报社调到了上海工作站。60岁父亲晓得后邪气激动，一定要我抽空到南京东路个亨达利钟表店，帮伊再买一只上海牌手表 。
我想送只更好一眼个手表拨伊作为60岁个生日礼物，伊硬劲勿肯，非要上海牌勿可。我想搿是父亲个上海南京路情结伐。
2009年，我恋爱了，伊是老上海人，中医世家，住勒“承兴里”老石库门里，离南京路步行街只有10分钟个路。
恋爱辰光，伊总归邀请我到老石库门白相，夜里带我去兜南京路步行街。上海人讲“荡马路”，就是搿种美妙个感觉。夜里个南京路步行街，音乐声轻扬，霓虹灯闪烁，我伲十指相扣，爱意绵绵，从西藏中路步行街出发，一直兜到河南中路，顺带便再去外滩“情人墙”，然后从原路数电线木头笃悠悠荡转去。
一路浪向，我搭伊讲我父母年轻辰光勒南京路个故事，伊静静叫个听，经过南京路亨达利钟表店辰光，伊拉我到店里，请服务员拿了一只贝壳色表面个浪琴机械表出来，搿是我顶顶欢喜个颜色了。伊讲：“勒贴贴对个辰光碰着贴贴对个人，浪琴代表我个心。时不我待，我伲订婚伐？”
一片冰心，倾刻融化。唯有时间更懂爱，南京路步行街见证了两代人纯真个爱情。
始于1851年个南京路是上海开埠后最早建个一条商业街。埃面有建于民国个永安百货、先施大楼，现代个世纪广场、世茂广场，还有远远叫就能看见个上海中心搭东方明珠，尤其是交关上海老字号，譬如老大房、邵万生、蔡同德、沈大成、张小泉、朵云轩咾啥，各式商品五彩斑斓，琳琅满目，让人眼花落花。漫步南京路步行街，上海滩“十里洋场”个繁华，尽收眼底。
今年，恰好是新中国成立70周年，老父亲也80岁了，伊有严重个职业病——心脏病，记忆力也远勿如从前。但只要讲到南京路步行街，讲到南京路亨达利钟表店，伊好像一记头恢复了所有个记忆。伊激动个讲：“新中国70周岁，我也80岁了，有生之年，还想再到南京路步行街看一看，到亨达利再买一只上海牌全钢机械表……”
10个月宝宝每天需要喝多少奶粉？
